Lo moratòri de tira sus las culturas OGMs !

Christian Pees, president de Pau-Euralis en aqueste mes de març qu’anonciava trenta mila ectaras de culturas d’OGMs en Aquitània e cinc mila en Bearn [1] ! Un collectiu que s’es creat en Bearn1 e ua manifestacion de mila personas de tota la region que’u responó davant la sedença de la « cooperativa », l’endoman d’ua conferéncia en la quau Patrick de Kochko, paisan en Òlt e Garona, contaminat en 1997 per semenças illegaus de sòja, e’u balhè ua replica argumentada.

Duas semanas mei tard sheis grevistas de la hami qui sostienen lo movement antiOGMs que son vienuts de Montreuil a Lescar, entà perseguir la soa accion. Qu’estón sostienuts per un quarantenat d’associacions e organes professionaus de França e de Brasiu, d’Italia o d’Alemanha, mes nat mot dens la premsa francesa (a mensh de Liberacion lo 22-03-07).

Lo govèrn, que vien de transpausar per decret la directiva europèa, çò qui priva l’Amassada nacionau e lo país d’un debat indispensable quan lo 86 % de la populacion e lo 62 % deus agricultors e disen la lor ostilitat aus OGMs. Estudis que muishan la toxicitat deus OGMs (G-E Seralini, CRIGEN, 02-072) e la bancarrota totau de las agriculturas qui’us an causits [2]. La contaminacion d’agriculturas biologicas e paisanas e de las semenças a l’entorn qu’es segura e irreversibla per longtemps au profieit de Monsanto (lo 90 % deus brevets au monde) e nada asegurança non vòu préner riscas dab OGMs aus camps e que refusan d’assegurar las cantinas qui’us balhan tà minjar aus mainats.

A Orléans, pendent los Estats generaus « Per un primtemps shens OGMs » dus cents personas que tribalhèn dus jorns en heurèr los arguments de l’Aperet d’Orléans [3] . Lo moratòri qu’es possible juridicament : Austria e Hongria que l’an declarat e los ministres de l’Euròpa (dont França) que l’an aprovat a despieit de la pression de lobbies e de la Comission europèa. Que’s pòt har mercés a « caracteristicas locaus » segon la directiva 2001-18 de l’UE.

Tots los candidats a la presidenciau qu’an pres posicion per aqueth moratòri (a mensh d’un), donc « après semiar que calerà darrigar » [4].

La resisténcia que s’organiza. Que creèn ALERTEOGM [5] entà engatjar la responsabilitat deus elejuts, agricultors o foncionaris entà que ne podossin pas díser que ne sabèn pas. Ua purmèra : lo clam d’un cople d’apicultors sostienuts per lo Civam47, sindicats d’apicultors e lo collectiu Alerteogm contra un « transgenicultor » qui vòu semiar dus cents ectaras de milhòc MON 810, pr’amor de la contaminacion inevitabla.

Lo Conselh regionau qu’a votat peu segond còp ua mocion per lo moratòri. Que finançarà experimentacions deus Civams entà mesurar la contaminacion a l’entorn deus camps de milhòc OGMs dens los cinc departaments d’Aquitània.

L’estiu que va estar caut. La guèrra dens las campanhas qu’es cridada ! N’es pas lo mendre mauhèit d’aqueras culturas egemonicas.