Usia de Pardiès : qu’an los pòrcs au milhòc !

Qu’avièn en junh passat un projècte d’usia d’agroetanòu a Pardiès qui deu emplegar cinc cents mila tonas de milhòc a l’annada. Los portaires que’n son l’AGPM (Associacion generau deus productors de milhòc), Maïsadour, Euralis, Lurberri, Lacadée e la multinacionala Abengoa au 51 %.

Lo discors oficiau es que la produccion de biocarburant dab milhòc qu’es a l’encòp ecologic e economic. N’es totun pas l’avís de tots ! Atau lo Comitat consultatiu sus l’etanòu deu Manitòba que muisha lo descompte de las emissions de CO2 sus tota la cadena despuish la cultura deu milhòc dinc a la distribucion deu carburant que pòrta ua reduccion de las emissions de CO2 deu 4 % e sonque entà un veïcule qui fonciona dab lo 10 % d’etanòu dens l’esséncia.

D’auts estudis, mensh partisans, que son mei sevèrs. L’universitat Cornell de New- York que concludeish que cau 1,3 litres de petròli entà fabricar un litre d’etanòu. Lo bilanç energetic qu’es donc negatiu ! Aqueth carburant qu’encaloreish donc lo planeta mei que l’esséncia ! Que cau hornir lo fèit que las suberparts d’engrèishs azotats de las culturas de milhòc que produseishen en se desgradar protoxide d’azòte (NO2) qui ahorteish l’efèit de sèrra dus cents còps mei que lo CO2 ! En suberhèita, entà arrecaptà’s un quilo de milhòc, que cau tres cents litres d’aiga e que cau tres quilos de milhòc entà har un litre d’etanòu. En clar, entà ua veituròta qui consumeish 5 l d’etanòu entà har cent quilomètres, cada quilomètre qu’aurà costat quaranta cinc litres d’aiga ! Aquò que s’apèra ecologia !

Tà çò qui es de l’aspècte economic, lo constat n’es pas mei lusent. Atau, l’« Inspection générales des mines », l’« Inspection générale des finances » e le « Conseil général du génie rural des eaux et forêts » qu’escriven en un rapòrt conjunt que los efèits sus las creacions d’emplecs que son mei que suberestimats. L’esfòrç fiscau per emplec creat o mantienut qu’es de 60 000 € per emplec au títol de la defiscalizacion, e qu’i cau hornir ua soma de l’ordi de 93 000 € au títol de la TAGP (impòst generau sus las activitats polluentas). Que concludeishen que tots los rapòrts e demuishan uei shens ambigüitat que la produccion d’etanòu en partir de milhòc qu’es ua solucion deu passat qui ne’s pòt pas perpetuar sonque en usias dejà existentas per partida o completament amortidas. La construccion d’ua usina navèra que seré ua error qui risca de costar car a tèrmi mejan, sii per bancarrota, sii per l’obligacion de mantiéner la rentabilitat mercés a investiments publics.

La sola utilitat d’aqueth projècte n’es pas, plan solide, la proteccion de l’environament, mes l’oportunitat de har partir ua part deu milhòc regionau. Que serà un gèste entaus agricultors, mes mei que mei entaus semencèrs, entaus quimistas e auts fabricants d’OGMs qui son a honhar per darrèr...

Los agricultors qui produsiràn milhòc entà fabricar etanòu que beneficiaràn en suberpés d’ua ajuda especiau a las culturas energeticas mesa en plaça dab la refòrma de PAC de 2003, d’un montant de 45 € per ectara. Que i aurà tanben ua envolòpa de dus cents milions d’euros de desfiscalizacion deus agrocarburants entà 2005 e ne cau pas desbrombar ua partida de l’envolopa de cent quaranta ueit milions d’euros de primas a l’irrigacion. Com ac precisa lo rapòrt mentavut mei haut, dab l’ajuda de 45 € per ectara, qu’auhereishen aus agricultors un prètz de crompa deu milhòc energetic mei haut que lo deu milhòc alimentari...

Que cromprenen perqué los dirigents agricòlas qui defenden la « vocacion exportadora de l’agricultura francesa » e hèn tot çò que pòden entà empachar l’accès au marcat francés de l’etanòu bresilian...