forum sociau lemosin

 

Forum Sociau Lemosin
fslimousin@free.fr

Actualitats Presentacion Obradors Armanac
Cortetas Contactes Liams Forum

Campanha Alimenterra en Lemosin : Contra la fam e la paubretat, defendam l’agricultura familhala

per  Maxime - 9/10/2006 - français

Contra la fam e la paubretat, defendam l’agricultura familhala.

Lo Collectiu Alimenterra dau Lemosin* organiza un merchat solidari e alimentari lo dissabde 14 d’octòbre de 9 oras dau matin a 6 oras de l’enser, plaça de la Mòta a Limòtges. L’i trobaran de las mòstras per mielhs compréner los enjuòcs alimentaris mondiaus, daus bancs associatius, daus paneus sus la cooperacion decentralizada entre la Region Lemosin e la Província de l’Obritengà au Burkina Faso. L’i se vendra daus produchs eissuts de l’agricultura paisana, biologica e dau comerci equitable.

De las conferéncias publicas sus lo tema « Contra la fam e la paubretat, defendam l’agricultura familhala » son prevudas :
-  A Tula en Corresa lo dimars 10 d’octòbre a 8 oras demiá de l’enser a la sala Latreille.
-  A Aün en Cruesa lo dimecres 11 d’octòbre a 8 oras de l’enser a l’auditorium dau liceu agricòla.
-  A Limòtges en Vinhana Nauta lo dissabde 14 d’octòbre a 3 oras de l’après-miegjorn jos lo chapiteu dau merchat solidari e alimentari, plaça de la Mòta.
Kiende Kassoum (agricultor) e Robert Nassa (president de la Chambra d’agricultura de la region dau Plateu Centrau) tesmonharan sus la situacion au Burkina Faso, e de las accions fachas dins l’encastre dau partenariat Lemosin - Obritengà seràn presentadas.

Fam e maunutricion son las prumieras causas de mortalitat dins lo monde, e tocan d’en prumier la campanha, ente los paisans an penas per aver pro sòus per se nurrir. Coma compréner ’queu paradòxe ? Coma securizar l’accès per tots a ’na nuridura sanciera e sufisenta ? ’Queu merchat solidari s’incriu dins la campanha « Alimenterra » que a per tòcas d’informar, de sensibilizar e de promòure de las solucions durablas a ’quelas questions. ’Na peticion serà perpausada per defendre los productors de lach mai los agricultors familhaus africans, que patissen de las exportacions europencas a pretz bas.

Per ne’n saubre mai : Maison daus Drechs de l’Òme Tel 05 55 35 81 24 - Site : mdh.limoges.free.fr

*Collectiu Alimenterra en Lemosin : Acuelh Paisan - Los Amics de la Garena - Los Amics de la Terra - ARDEAR - Artisans dau Monde - Associacion Clorofila - Attac - CCFD - Centre Natura La Loira - Ciutadans dau Monde 19 - Confederacion Paisana - Cooperativa Participativa de Limòtges - Forum Sociau Lemosin - FSU - Gablim - Los Amics de Jayyous - Lemosin Palestina - MDH - Mashikuna - Movement de la Patz 19 - Pòple e Cultura - los actors dau partenariat entre la region Lemosin et la província de l’Obritengà.

Plan dau sit | Version Tèxt | Acuelh dau sit | Contactes