forum sociau lemosin

 

Forum Sociau Lemosin
fslimousin@free.fr

Actualitats Presentacion Obradors Armanac
Cortetas Contactes Liams Forum

Una novela campanha de patz per los Pataxó Hãhãhãe

per  Maxime - 27/09/2006 - français
La Maison daus Drechs de l’Òme de Limòtges (Occitània - França) emb lo sosten financier dau Conselh Regionau dau Lemosin s’es engatjada a sosténer una campanha de Patz daus Pataxó Hãhãhãe coordonada au Brasil per l’ONG Thydêwa.

’Quela campanha que se deu se passar dau mes d’aust 2006 au mes d’aust 2007 a per objectiu de redusir las tensions entre comunautats e promòure la patz per ’na coneissença mutuala melhora . S’agis de desvelopar lo dialògue entre los Indians e los autres dins ’quela region. Se farà per lo desvelopament de liams coma divers actors sociaus de l’Estat de Bahia e de las intervencions nombrosas dins los luòcs publics e mai daus establissaments escolars. Dins un prumier temps, un libre en version portuguesa permetrà de facilitar ’queu trabalh de divulgacion de la cultura Pataxó Hãhãhãe. A terme mejan, la realisacion d’un libre en version francesa permetrà de far lo mesma trabalh en França.

Lo Nordeste fuguet la prumiera region dau Brasil colonizada per los portugués, i a mai de 500 ans. Dempuei, la majoritat daus indians que vivian dins ’quela region fuguet decimada. Dempuei 1982, las quauquas familhas subrevivas de la comunautat Pataxó Hãhãhãe comenceren de luchar e defendre lors drechs e lor país. Lo governament boinet un sector de 54000 ectars. Maugrat ’quela reconeissança, los Indians ne’n dispausan nonmàs d’un tierç e son confrontats aus grands proprietaris terrenaus que lor vòlen pas tornar lo país. Dempuei 20 ans, mai d’un militant indian fugueren assassinats en luchar per la defensa de lors drechs. ’Queu clima de violença nais tanben dau racisme e de la mesconeissença mutuala entre los indians e lo demai de la populacion.

Dins l’encastre d’una virada francesa iniciada per lo Réseau des Lieux Associatifs de Création et de Solidarité (RELACS) a la darriera 2005, quatre Indians dau Nordeste dau Brasil, dont dos de la comunautat Pataxó Hãhãhãe, fugueren reçauguts en Lemosin per divers actors associatius. ’Quela campanha es l’enchaison de gardar lo contact entre militants indians e lemosins.

Per veire le compte-rendut de la virada en França daus indians dau Nordeste en 2005 : http://www.reseau-relacs.org/thydew...
Lo site de la Maison daus Drechs de l’Òme : http://mdh.limoges.free.fr/pataxo

Plan dau sit | Version Tèxt | Acuelh dau sit | Contactes