forum sociau lemosin

 

Forum Sociau Lemosin
fslimousin@free.fr

Actualitats Presentacion Obradors Armanac
Cortetas Contactes Liams Forum
Dissabdes 10 de Junh 2006 : Jornada nacionala d’accion per la defensa e lo desvelopament daus servicis publics.

Manifestacion regionala dissabdes 10 de junh a 10 oras demiá davant la gara d’Aimostier

per  Maxime - 7/06/2006 - français

Ensem, farem de ’questa jornada, ’na jornada de convergéncia de totas las fòrças que son en lucha per que siá reconegut e mes en òbra, per de las mesuras politicas e lors traduccions legislativas, lo ròtle indispensable daus servicis publics dins ’na societat solidària que se reclama de las valors republicanas de laïcitat, libertat, egalitat e fraternitat.

- 10 oras demiá Manifestacion regionala a la gara e accion especifica sus lo transpòrt ferroviari

- Miegjorn Marendon

- 2 oras Forum : « Quaus mejans metre en òbra per far viure un servici public en fasi emb los besunhs de nòstre temps ».

Perque n’accion lo matin ?

Los esforç daus Lemosins en matèria de tanspòrt ferroviari fan tots los jorns la pròva de lor pertinéncia que se remarca per l’augmentacion regulara de la frequentacion. Mas, uei vai lo servici public ferroviari èsser roinat per las chausidas liberalas conjugadas dau governament e de Réseau Ferré de France ? La question es legitima vesent las darrieras decisions presas e las recentas declaracions dau Ministeri daus Transpòrts demenesissen pas l’esmai.

’Laidonc que lo bureu d’estudi e de susvelhança de la SNCF barra mas son bilanç tant qu’a l’estat de la viás farradas, s’avera que fòra las linhas TGV e los grands axes ferroviaris, lo malhum farrat se fai vielh e mai, es en meschant estat. ’Quela situacion de degradacion pòt ésser la rason daus incidents e accidents coma la desralhada de Sant Flor en 2006.

Per redreçar ’quelas deficiéncias sens investir la mendre centima, qu’es estat decidit de redusir la vistessa sus las vias que an de las anomalias. Quò es lo cas de quatre linhas en Lemosin :

1. Limòtges, Briva per Sent-Iriès

2. Limòtges, Peitieus

3. Montluçon, Ussel

4. Limòtges, Ussel.

Sus ’quelas linhas, òm pòt esperar d’aura en çai per endrechs la vistessa daus trens a vapor dau començament dau 20esme segle !

’Quela situacion es intolerabla. Penaliza los usatgiers e ajuda a discreditar lo transpòrt ferroviari public. Òm constata que Réseau Ferré de France es mai migró de la circulacion daus trens privats de la CONNEX que de las quesions de benèsser de l’usatgier, d’environadís e d’aisinament dau territòri.

Quò es pas lo fach d’una lei naturala, mas ven tot drech de las chausidas liberalas que son fachas dempuei mai d’una annada, caracterizadas per lo desengatjament de l’Estat denonciat per lo president de la Region Lemosin, JP Denanot. Quò es tanben los criteris de gestion adoptats per RFF que privilegian la rentabilitat dau capitau a d’autras consideracions, fenomènes amplifiats per la separacion daus entitats RFF e SNCF que participa a crear de las opausicions estrategicas entre las doas entrepresas.

La liaison Bordeaux Lyon est un exemple du renoncement des pouvoirs publics à maintenir un service public de qualité à travers le Massif Central.

L’après-miegjorn, desbat generau sus los servicis publics :

La ralha es pas malurosament la sola victima de ’queu trabalh de sapa impausat au servici public ; las populacions e las comunas lo paian e los exemples son nombros :

-  Lo servici public postau que barran los bureus e que la perenitat de las soas agencias postalas es pas assegurada.

-  Lo sector public de la santat, onte emb daus fallaciós pretextes de rentabilitat, barran daus ospitaus de proximitat inhorant las recomandacions daus protocòles medicaus que preconizan que tot ciutadan deu poder èsser pres en charja per un servici d’urgéncia en mens de 30 minutas.

-  L’educacion nacionala e las barraduras autoritàrias de classas.

-  L’energia emb la temptativa d’agorrinar GDF a SUEZ per, a fin de temps, presentar la factura a l’usatgier.

-  Los servicis de l’Esquipament, los servicis de l’Estat que tòrnan estructurar, ...

Quò priva nòstres territòris de capacitats realas de desvelopament.

Uei, fai mai que mai mestier de surtir de ’quela logica que destabiliza las collectivitats territorialas e los usatgiers. Chau que resistam a las politicas qu’organizan las regressions e lo desbarrancament daus servicis publics e exijam que sián mes en capacitat de garantir sus tot lo territòri, l’accès liure e egau de totas e tots aus drechs fondamentaus e que pueschan jugar un ròtle determinant dins l’aisinament equilibrat dau territòri, lo respect de l’environadís e la satisfaccion daus besonhs sociaus essenciaus.

Veire lo siti nacionau daus Collectifs pour la Défense et le Développement des services publics : Vivent les services publics

Plan dau sit | Version Tèxt | Acuelh dau sit | Contactes