Novela mobilizacion per sostener los sens papiers lo dimecres 31 de mai

Lo Collectiu daus « Sens Papiers » e los que los sostenen volen mai que mai contunhar la lucha !

Lo Collectiu daus Sens Papiers de Limòtges, e las organizacions* que los sostenen, apelan a ’na manifestacion lo dimecres 31 de mai a 6 oras de l’enser davant la prefectura, seguida d’un repasson plaça Stalingrad.

S’agis de denonciar l’acceleracion sus Limòtges de las interpelacions e mesas en retencion de personas que demoren en França dempuei fòrça annadas.

Fin de 2005, lo Collectiu daus Sens Papiers aviá tornat damandar d’èsser recebut per lo Prefect. I a pas ’gut de responsa dempuei.

A l’encontrari de çò que dit lo ministre Sarkozy (que los collectius de sens papiers representen nonmas ilhs-mesmas), a Limòtges los sostens contunhen de s’amodelonar : mai de 10.000 ciutadans an signat la peticion de sosten au collectiu, de las collectivitats territorialas an votat de las mocions de sosten, un collectiu d’elegits a damandat d’èsser recebut per la prefectura per parlar de la situacion indigna viscuda per los « sens papiers ».

Lo Collectiu daus Sens Papiers damanda d’engueras la regularizacion collectiva. Migros de veire beucòp de refus de demorança, lo collectiu vòu qu’òm torna esperpissar los dorsiers..

Per n’en saubre mai : Maison daus Drechs de l’Ome - Tel 05 55 35 81 24 - Site : http://mdh.limoges.free.fr/support/...

*Les organizacions que sostenen lo collectiu : ADS, ATTAC 87, CCFD, CGT CNASEA, FSU, GISTI, Inter 87 FSU, Jeunes CGT 87, USD Santé Social CGT, LCR, LDH, Limousin Palestine, MDH, MRAP, PCF, Ras L’Front, Sud Education Limousin, Sud Etudiants, Sud Santé Sociaux, Les Verts.