forum sociau lemosin

 

Forum Sociau Lemosin
fslimousin@free.fr

Actualitats Presentacion Obradors Armanac
Cortetas Contactes Liams Forum
+

Robert Lafont se’n va amb los fuòcs de Sant Joan

per  Maxime - 29/06/2009 -

Es lo jorn de la Sant Joan, lo dimècres 24 de junh, que Robèrt Lafont es partit. Una data que vei treslusir fuòcs bèls per una nuèch corteta, pròcha de la data simbolica del solstici d’estiu. Nascut a Nimes lo 16 de març de 1923, aquela cara bèla de l’istòria europenca del sègle XXen es defuntada a Florença. Ende Occitània o Toscana, ciutadan d’Euròpa e del mond, Robèrt Lafont quitèt pas de s’adreçar al mond tot e d’obrar dins maites domenis. Es un dels mai bèls pensaires del mond occitan contemporanèu.

Se trapa dins la resisténcia en 1944 per participar a la liberacion de Nimes. En 1945, participa a la fondacion de l’Institut d’Etudis Occitans e beneficia de l’apièg d’intellectuals coma Joan Cassou, Tristan Tzara.

La part d’activitat que Robèrt Lafont dedica a l’accion politica es bèla. En 1962 fonda lo Comitat Occitan d’Estudis e d’Accion. Per las annadas 60, lo sieu libre, La révolution régionaliste, es remarcat per d’òmes coma Mendès France, Rocard o Mitterrand. Per las annadas 1970, son combat crosa lo del Larzac. En 1971 fonda « Lucha Occitana » e tres ans mai tard, presenta sa candidatura a las eleccions presidencialas, recusada pel Conselh Constitucional.

En faire son mestièr d’ensenhaire, escriu amai una òbra literària e scientifica de tria tant dins lo domeni de la poësia (per exemple Lausa per un solèu mòrt e Reviudat), coma del roman (per exemple La Fèsta), del teatre (per exemple Lei cascavèus), emai d’ensages (per exemple Nosautres, Pòble europenc). L’ensemble de son òbra e una brava partida de sa correspondéncia son depausats al Cirdòc a Besièrs.

En 2003, sul Larzac, sosten la creacion del movement altermondialista « Gardarem la Tèrra » que ne signa lo tèxt fondador.

Los dissabte 26 e dimenge 27 de setembre de 2009 a Nimes, a l’initiacitiva de son Comitat dau País Nimesenc, Gardarem la Tèrra farà viure la memòria d’aquel grand òme, ciutadan d’Euròpa e del Mond, que prepausarà un collòqui titolat « Robèrt Lafont, la nauta consciéncia d’una istòria ».

Entresenhas collòqui :
-  corrièl: gardaremlaterra@yahoo.fr
-  tél. 04 66 62 32 21

Plan dau sit | Version Tèxt | Acuelh dau sit | Contactes