Lo Forum Sociau Lemosin prepara 2007

Qu’es a Limòtges lo 13 de genier que se son amassats los membres dau Forum Sociau Lemosin.

D’en prumier un bilanç : dempuei 2002, le Forum Sociau Lemosin s’afirma coma un espaci permanent de desbats, vertadier coador d’accions e de cooperacions entre actors de la societat civila.

Nòu Vic, maugrat la distancia e la tròp granda dispersion daus luòcs sus plaça, fuguet en 2006 lo rendetz-vos de ’quilhs que porten en Lemosin, e en-delai, las alternativas per un monde mai solidari : resisténcia a la globalizacion liberala - solidaritat internacionala - neocolonialisme daus país daus nòrd - sens papiers - un autre biais per l’agricultura - quau Limousin volem ? - plaça de la cultura occitana - alternativas possiblas - plaça daus ciutadans dins la vita publica - los servicis publics - un autre biais de trabalhar - los drechs au trabalh ... Los eschamnhes montreren quantben las tematicas de desbats son richas, siran contunhats pendent lo 5esme Forum Sociau Lemosin.

Quatre obradors se destachan ujan :
  L’agricultura, los subremerchats, consomacion, environadis ;
  Solidaritat internacionala, diversitat culturala e lingüistica, reconeissança de las identitats ;
  Servicis publics, transpòrts... ;
  Democracia participativa, ciudanitat, desbats publics.

Lo Forum chamnhara de fòrma emb daus forums delocalizats :
  lo 5esme Forum Sociau Lemosin se tendra la darriera setmana de setembre a Nòu Vic en Corresa, mai centrat dins lo còr de vila ;
  un Forum Sociau Lemosin a la prima 2008 se tendra a Beubruelh a Limòtges e tornara prener totas las tematicas dau FSL emb l’accent sus la vila, la banlega e la jounessa. Demai, quauques temas siran abordats jos de las fòrmas delocalizadas : un Forum Sociau de la Solidaritat internacionala se tendra en novembre.

Dempuei ’queste prumier semestre de las datas de pas obludar :
  lo 10 de març, participacion aus Estats generaus de defensa e desvelopament daus servicis publics a París ;
  lo 17 de març, lo FSL siran present a Besièrs au 2esme rendetz-vos per la preservacion de la diversitat lingüistica e culturala dins lo monde e la preservacion de la lenga occitana : « Anem ! per la lenga occitana : Oc ! »
  los 4-5-6 d’abriu, coma los intermitents de l’espetacle au Buçon en Cruesa e la virada musicala e discussion ciutadana « Aux urnes ..etc. »

Lo FSL es un luòc ente mai de 1500 personas e mai de 200 associacions se son organizats en malhum per far circular l’informacion. Contacte : http://fslimousin.free.fr o 05 55 35 81 24

Yvan Tricart.